L'Ensame pa la Oficialidá de la Llingua Asturiana ye l'entamu d'una
nueva asociación de defensa de la llingua del País Asturianu.
En considerando que'l derechu a la llingua propia ye daqué irrenunciable
en tolos ámbitos, y que la so represión nun tien sitiu nuna Europa
democrática, la Oficialidá de la llingua asturiana ye la ferramienta
imprescindible pal desendolque d'esta llibertá, tanto individual como
en comuña. Poro, esti Ensame pa la Oficialidá naz de la necesidá
de defender la Oficialidá como l'únicu camín pa la normalización
social del astunianu, asina como p'algamar el respetu de los derechos llinguisticos
que n'Asturies vienen vulnerándose de contino.
L'Ensame pa la Oficialidá de la Llingua Asturiana ye una aportación
más al esfuerciu en comuña que tola sociedá tien de facer
pa iguar el conflictu llinguísticu que sufre Asturies. L'Ensame pa la
Oficialidá ye una xera más que se suma a esi ya llargu llabor
ciudadanu.
L'Ensame pa la Oficialidá va trabayar na igua’l conflictu llingüísticu
que se da n'Asturies, que sufre una fuerte represión idiomática
ya identitaria y una situación política predemocrática
y preconstitucional. Va trabayar pola reconocencia oficial del asturianu como
llingua propia d´Asturies y pola so normalización social, por defender
los derechos llingüísticos del Pueblu Asturianu y dar rempuesta
a les agresiones con que los partíos políticos PSOE y PP lo quieren
tarazar, por xenerar alternatives a les polítiques actuales que disimulen
la represión identitaria, especialmente aquelles qu’arrenuncien
a la Oficialidá a cambeu d’una supuesta permisividá pa col
asturianu yá que la reconocencia de los derechos democráticos
de los asturianos, ente ellos la Oficialidá, nun ye un bien negociable.
Nel Ensame pa la Oficialidá fairáse por encontiar la xunidá
llingüística d’Asturies, frente a los intentos de dixebrar
l’asturianu, compartiendo asina la posición hestórica del
movimientu de vindicación llingüística: l´asturianu,
la llingua de toles tierres asturianes, con toles sos variantes y nomes que
reciba (asturianu, asturlleonés, bable) ye la llingua de tolos territorios
hestóricos d'Asturies y de tol so dominiu llinguísticu (Asturies,
Lleón, Zamora y Cantabria).
L'Academia de la Llingua Asturiana como istitución llingüística
cimera y la única qu'entiende no que cinca a la normativización
llinguística nel País Asturianu recibe l'apoyu total na so xera
de defensa los derechos llinguísticos de los asturianos.
L'Ensame pa la Oficialidá quier cuntar con toos y axuntar a los más
pal desendolque desti ya vieyu llabor ya informará a xeitu de toles sos
futures actividades ya iniciatives.
Datos de la Fuente:
Cai Fermín Suárez, 5, 1º A
33212 Xixón - Asturies
ensame_oficialida@yahoo.es
